Foar ús leit de nije Kadernota Begrutting 2006. Us kompliminten foar dizze opset, ek de rjochtmjittigens fan de jierstikken wie goed yn oarder neffens de eksterne akkountant. Spitigernôch kinne wy dat net sizze fan de kommunikaasje mei de provinsjale stakehâlders en dat muoit ús tige. Noch yn de begruttingsgearkomste fan 3 novimber foarich jier hat it Kolleezje in CU/SGP-amendemint oernommen, dêr’t just dy eksterne kommunikaasje mei boargers, organisaasjes en oerheden alle klam kriget: “Adequate communicatie met burgers en maatschappelijke stakeholders (burgers, organisaties en overheden).” En dan krije de Steaten dochs wer op’e nij in grut tal klachtskriften en teloarstelde ynspraakréaksjes op it boardsje fan benammen kulturele organisaasje as de provinsjale musea en Keunstwurk, dy’t harren ûnrjochtmjittich behannele fiele troch de Provinsje. Steatebreed wiene wy dêr net oer te sprekken. Hoe giet de oerheid mei syn stakehâlders om, dat is de kwestje. Op 1 juny hat de polityk in ûnmiskenber sinjaal krigen, dat der in grutte kleau sit tusken de miening fan in grutte mearderheid fan de boargers en de politike pommeranten. Dat jildt dus net allinnich foar Brussel en De Haach mar ek foar Ljouwert. Wolle ús boargers yn mearderheid wol in Sweeftrein en hawwe se ferlet fan in Nij Frysk Museum, wylst der om raak besunige wurde moat op it gewoane iepenbier ferfier en de besteande musea? Soe it miskien ek ferstannich wêze, om oer beide saken dochs earst noch marris goed by de achterban te riede te gean? De Keamer wol wol trochpakke, mar it Ryk lit de Sweeftrein noch mar wat sweve. Wolle wy dat ek? Wy bliuwe mei de fuotten op Fryske grûn en bepleitsje mear lykwicht tusken ekonomy en ekology. As goede rintmasters moatte wy sunich wêze mei ús grien-blauwe romte. Ek dy heart ta it ûntwerp fan de Skepper.

 

Us fraksje hat it Kolleezjeprogram net ûnderskreaun. Wy fiele ús dêrom net bûn oan it stribjen om no 2 miljoen te weroerwaagjen. Wy wolle sels mear dwaan, njonken de effisjinsykoarting fan op syn minst 2,5 miljoen:

 

Twaddens slagge wy foar it befriezen en foar oare doelen opnij ynsetten fan de Bestimmingsreserve Suderseeline, dy’t no noch fuorre wurdt mei 75% fan it ekstra NUON-dividend boppe de jierliks begrutte 7,9 miljoen euro. Dat betsjut foar it NUON-dividend 2004 in bedrach fan 75% oer 5,5 miljoen (13,4-7,9) = goed 4  miljoen euro en as wy hjir de goed 3 miljoen euro oer 2003 bytelle, dan komme wy op rom 7 miljoen euro dy’t wy oars ynsette kinne. Wy wolle wiswier wol ynvestearje yn kwaliteit, mar dan sjogge wy earst nei ferbettering fan de kwaliteit fan de besteande ynfrastruktuer, wurkgelegenheid, maatskiplike en kulturele foarsjennings. In bettere berikberens fan Ljouwert (NW-tangent en Haak), bettere ûntsluting fan Noard-East Fryslân (Sintrale As) en it goed oerein hâlden fan it foarsjenningsnivo yn ús stêdden en doarpen fine wy perfoarst needsaaklik.

 

 

 

Treddens it ferheegjen fan de opsinten. Wy hawwe yn de kommisje al sein dat wy foarearst foar 2006 net fierder gean wolle as de al earder útstelde 5% ferheging fan de opsinten. Utsein in bettere ûnderbouwing fan it Kolleezje, fine wy in ekstra ferheging mei 10% op dit stuit net ferantwurde tsjinoer ús boargers.

 

Yn de kommisje B&M ha wy de nedige kanttekenings makke by de ûnderskate beliedsprogramma’s en tema’s yn Spoar 1. Wy wolle perfoarst net besúnigje op wegenûnderhâld, miljeuhanthavening, soarch en kultuer. Wat de majeure programma’s en projekten fan Spoar 2 oanbelanget, geane wy op dit stuit net akkoart mei de kofinansiering fan in Nij Fries Museum en it Stedskonvenant Ljouwert. En fierder binne wy fan betinken dat earst besocht wurde moat de finansiering fan it Bedriuwenterrein haven Flylân en it Kennissintrum Amelân by it Waadfûns ûnder te bringen. Dat levert in besparring op fan likernôch 8 oant 13 miljoen euro. Dat is op jierbasis 2 oant 3,25 miljoen euro (sjoch Oersjoch 4, s. 114). En dan ha wy it net oer it NUON-jild. Wy wolle hjiroer op 27 juny yn debat mei de oare partijen.